Әниләр хөрмәтләнде

Халыкара хатын-кызлар көне алдыннан тарих һәм крайны өйрәнү район музеенда хәрби-патриотик чара узды. Бәйрәмгә олы кунаклар буларак махсус хәрби операциядә һәм “кайнар нокта”ларда һәлак булган якташларыбызның әниләре чакырылды. Район администрациясе Башлыгы И.Ш.Магдеев, музей директоры Р.М. Байбикова хатын-кызларны киләсе бәйрәм белән тәбрикләп, батыр һәм кыю уллар үстергәннәре өчен олы рәхмәтләрен җиткерделәр. Иске Кулаткы 1 һәм 2 нче номерлы урта мәктәпләре укучыларының матур чыгышлары әлеге чарага ямь өстәде. Район үзәгендә Бөек Ватан сугышында һәлак булган якташларыбыз истәлегенә төзелгән һәйкәлгә венок куелды.