Хәрби хезмәттән кайтты

Ватанны саклау — ир-егетнең изге бурычы. Шушы хакыйкатьне яхшы аңлаган егетләребез, ничек кенә булса да, армия сафларына барырга тырыша. Иске Мостяк авылы егете Илнур Фәритович Нугаев та шундый батыр һәм мактауга лаек егетләребезнең берсе. Яшь егет декабрьнең соңгы көннәрендә генә туган ил алдында куелган изге бурычын утәп, туып үскән нигезен, әти- әнисен, туганнарын, дусларын сагынып туган йортына кайтты. Армиядән солдат кайту якыннары һәм туганнары өчен һәрвакыт олы куаныч.
Илнур Иркутск өлкәсендә хәрби хезмәтен үткән. Армиягә киткәнче, Ульяновск политехник университетын тәмамлаган һәм авиация заводында хезмәт юлын башлаган. Армиядән ул тагын да чыныгып, җитдиләнеп кайткан.
– Армиядә хезмәт итүне һәр егетнең бурычы дип саныйм. Ир-атлар авырлыклар алдында каушап калмаска, аларны җиңә белергә тиеш. Армия минем өчен тормыш мәктәбе булды. Ныгып кына калмадым, яңа дуслар да таптым, моңарчы ишетеп кенә белгән күп шәһәрләрне күрдем. Әле хәрби хезмәткә алынырга өлгермәгән дус-ишләремне дә кызыктырдым. Җәйгә алар да армиягә барырга уйлый, — дип уртаклашты фикерләре белән Илнур.
Яшь егеткә киләчәк тормышында тагын да зуррак уңышларга ирешүен теләп калабыз.

Постоянная ссылка на это сообщение: http://kumiakk.ru/?p=5079

Добавить комментарий

Ваш адрес электронной почты не будет опубликован.