Мар 20 2019

25 март — Мәдәният хезмәткәрләре көне

Хөрмәтле мәдәният хезмәткәрләре
һәм сәнгать эшлеклеләре, әлеге тармак ветераннары! Сезне йөрәктәге иң җылы хисләр аша һөнәри бәйрәмегез белән тәбрик итәбез! Яз фасылы әйләнә-тирә дөньяны ничек үзгәртсә, мәдәният тә кешене нәкъ шулай ук рухландыра, аның күңелендәге иң яхшы сыйфатларны һәм иҗади мөмкинлекләрне уята. Нәкъ менә сезнең күп көч таләп итүче көндәлек хезмәтегез рухият, әхлакый хакыйкать һәм матурлык башлангычын саклап калуда ярдәм итә.
Башкалар ял иткән вакытта, сез хезмәт куясыз, күңел җылыгызны кызганмыйча, халыкка бүләк итәсез, матурлык дөньясына алып керәсез. Күзгә күренми һәм тоемлау да мөмкин булмаган ниндидер көч аша әлеге хезмәт милләтләр берлеген тәэмин итә, шул ук вакытта шәхси үзенчәлекләрне саклап калуга да булыша, безне үзенә бер төрле итә. Иҗатыгыз һәм эшсөючәнлегегез нәтиҗәсендә, Иске Кулаткы муниципаль районы мәдәнияте үз үсешендә шактый зур казанышлары белән аерылып тора.
Күпкырлы талантыгыз, тырыш хезмәтегез һәм рухи юмартлыгыгыз өчен сезгә ихлас күңелдән рәхмәтләребезне белдерәбез. Сезгә сәламәтлек, күңел күтәренкелеге, илһам, үз көчегезгә һәм киләчәккә ышаныч телибез. Алга таба да сезнең хезмәтегез, талантыгыз һәм осталыгыгыз искекулаткылылар күңелендә бары тик кайнар хисләр генә уятыр дип ышанабыз!
Л. Ф. Богданова,
Иске Кулаткы районы Башлыгы,
“Бердәм Россия”
партиясенең урындагы бүлекчә Секретаре.
И. Ш. Магдеев,
Иске Кулаткы район
администрациясе Башлыгы.

Постоянная ссылка на это сообщение: http://kumiakk.ru/?p=3100

Мар 20 2019

Гадәттән тыш хәлләр куркытмас.

Ульяновск өлкәсендә язгы ташкыннарга көрәш буенча оператив төркемнәр эше оештырылды. Әлеге мәсьәлә өлкә Губернаторы С. И. Морозовның шәхси контролендә тора. Быел безнең төбәктә язгы ташуга каршы эшләр алып бару өчен якынча 4900 кеше җәлеп ителә торган чаралар төркеме оештырылды. Дәвамы газетаның 12 номерында укыгыз.

Постоянная ссылка на это сообщение: http://kumiakk.ru/?p=3096

Мар 13 2019

Укучыларыбыз сынатмады

Иске Кулаткы район мәктәпләре укучылары кайда гына барып нинди генә бәйгеләрдә, ярышларда катнашмасыннар уку ягыннан булсын, спорт буенча булсын, гел мактаулы урыннар алып, җиңүләр яулап кайталар.
5 март көнне дә Иске Кулаткы беренче номерлы урта мәктәбе укучылары Татарстан Республикасының Яшел Үзән шәһәрендә үткән конференциядә катнаштылар. Шәһәрнең 10 нчы номерлы гимназиясе базасында ел саен, матур традиция буларак, Каюм Насыйри исемендәге ХVII Халыкара яшьләр фәнни-гамәли конференциясе үтә. Әлеге конференция гадәттә 2 турда уза. Беренче тур барышында бәйгедә катнашучылар арасыннан “иң яхшы” эшләрне сайлап алалар. Аннан инде беренче турны узган укучылар икенче турда төрле төбәкләрдән килгән конкурсантлар белән жюри членнары алдында чыгышлар ясыйлар. Быел икенче турга барлыгы 323 эш сайлап алынган. Укучыларның проект эшләренә Казан федераль университетының, Татарстан Республикасы фән Академиясенең, Галимҗан Ибраһимов исемендәге тел, әдәбият һәм сәнгать институты, Россия Ислам университеты профессорлары, педагогика, филология, физика-математика, биология фәннәре буенча фән кандидатлары, доцентлары бәя биргәннәр. Каюм Насыйри исемендәге фәнни-гамәли конференциягә укучылар илебезнең төрле шәһәрләреннән – Мәскәү, Казан, Саратов, Ульяновск, Димитровград, Яр Чаллыдан, Башкортстан, Чувашия, Мордовия Республикаларыннан килгәннәр. Араларында хәтта Кытай, Казахстаннан да килүчеләр булган.
Конференция тантаналы концерт һәм танылган сәхнә йолдызларының чыгышлары белән башланып киткән. Аннан укучылар үз фәннәре буенча секцияләрдә проект эшләрен яклаганнар.
Безнең Иске Кулаткы районын беренче номерлы урта мәктәбеннән 8 укучы тәкъдим итте. ХI cыйныф укучылары Алсу Усманова “Наша жизнь сплошные логарифмы?” (фәнни җитәкчесе математика укытучысы Рәхимә Абдулловна Үмәрова), Ильяс Курамшин “Дети блокадного Ленинграда” (фәнни җитәкчесе тарих укытучысы Кадрия Әдһәмовна Исхакова) һәм Марсель Юмангулов “Неизвестный курган Старокулаткинской земли – погребальный памятник или курган?» (фәнни җитәкчесе география укытучысы Эльмира Хәйдәровна Ибраһимова) проектлары белән 1 урыннарны яуладылар, ә шул ук сыйныф укучысы Дильнара Тагирова “Межпредметная связь в тригонометрии” проектын (фәнни җитәкчесе математика укытучысы Рәхимә Абдулловна Үмәрова) яклап, лауреат дипломы белән билгеләнде. Х сыйныф укучысы Эмиль Сәйфуллин “Изучение радиационного фона на территории Старокулаткинского района” темасына (фәнни җитәкчесе физика укытучысы Римма Зәкәрьевна Халикова) проекты белән 1 урынны алды. Ә IХ сыйныф укучысы Эльвина Сәйфуллина “Мониторинг лесных пожаров на территории Старокулаткинского лесничества” темасына (фәнни җитәкчесе биология укытучысы Розалия Равиловна Аделова) проекты белән 3 урынга лаек булды. VII «А» һәм «Б” сыйныфлары укучылары да Дамир Абитов “Детский фольклор моей малой Родины” (фәнни җитәкчесе рус теле һәм әдәбияты укытучысы Гөлшат Рәхимҗановна Усманова) һәм Валентина Семина “Как я могу сэкономить семейный бюджет” (фәнни җитәкчесе математика укытучысы Гүзәл Абузәровна Ахметова) 3 урыннарны яулап, Дипломнар белән бүләкләнделәр. Ә балаларны әзерләгән укытучылар – фәнни җитәкчеләргә конференция җитәкчелеге тарафыннан рәхмәтләр белдерелде һәм Рәхмәт хатлары тапшырылды. Без дә җиңүчеләрне һәм аларның остазларын уңышлары белән тәбриклибез!
С. Абитова.

Постоянная ссылка на это сообщение: http://kumiakk.ru/?p=3091

Мар 13 2019

Пищеблок яңарды

Иске Кулаткы район больницасы 1971 елда төзелеп эксплуатациягә тапшырылган иде. Ярты гасырга якын вакыт эчендә ул таушала башлады. Шуны исәптә тотып, соңгы елларда төрле программалар нигезендә хирургия, балалар бүлегенә капиталь ремонтлар ясалды.
Ә якташыбыз Э. Ә. Ганеев терапия бүлегенә капиталь ремонт ясауда, лифтны сафка бастыруда, су линиясен торгызуда зур ярдәм күрсәтте.
2018 елда “Ульяновскспецстрой” хезмәткәрләре район больницасының пищеблогына капиталь ремонт ясадылар. Эш барышында алар бинаның тышын матур итеп тышладылар, түбәсен алмаштырдылар.
Пищеблокның эченә дә (131,3 квадрат метр) капиталь ремонт ясалды. Биредә стеналарга кафель ябыштырылды, тимер ишекләр, евротәрәзәләр куелды һәм санузел яңартылды.
Югарыда әйтеп үткән эшләргә махсус программа нигезендә 2 миллион 437 мең сум акча тотылды.
Бүген Иске Кулаткы район больницасының пищеблогына карап сокланучылар шактый күп. Гомумән әйткәндә, авыруларга аш пешерү өчен барлык уңай мөмкинлекләр тудырылды.
Р. Арифуллин.

Постоянная ссылка на это сообщение: http://kumiakk.ru/?p=3087

Мар 13 2019

Май чабуда күңел ачтык

9 март көнне Иске Кулаткы районының Чуваш Кулаткы һәм Яңа Лебежайка авылларында “Май чабу” (Масленица) бәйрәме үтте. Бу матур чарага ике авылдан да бихисап халык җыелган иде.
Чуваш Кулаткы авылындагы бәйрәм тантанасы иртәнге 10 сәгатьтә башланды. Моңлы итеп рус һәм чуваш телендә яңгыраган такмаклар һәркемне авылның мәйданына килергә өндәде.
Иске Кулаткы районы Башлыгы Л. Ф. Богданова халыкны район администрациясе һәм үз исеменнән чын күңелдән матур бәйрәм белән кайнар тәбрикләде.
Әлеге тантанада төрле уеннар, биюләр башкарылды һәм ярышлар белән мавыктыргыч конкурслар үткәрелде. Ярышларда җиңүчеләргә бүләкләр тапшырылды.
Р. АРИФУЛЛИН.

Постоянная ссылка на это сообщение: http://kumiakk.ru/?p=3080

Мар 13 2019

Яз бәйрәмнәр белән күркәм

7 март көнне Иске Кулаткы район мәдәният йортында Халыкара хатын-кызлар көненә багышланган зур концерт булды. Бәйрәм чарасында тамашачыларны 8 март көне белән Иске Кулаткы районы Башлыгы Л. Ф. Богданова, район администрация Башлыгы И. Ш. Магдеев исеменнән экономик мәсьәләләр буенча администрация Башлыгының урынбасары И. Х. Ахметов һәм район администрациясе Башлыгының социаль мәсьәләләр буенча урынбасары И. Ө. Хәсәнов тәбрикләделәр. Һәвәскәр артистларыбыз башкаруындагы моңлы җырлар, нәфис сүз, шаян юмор тамашачыларны кич буе сөендерде. Концерт программасын район мәдәният йорты рәисе Раил Тюкаев һәм Ульяновск шәһәренең мәдәният-агарту училищесы студенты, талантлы якташыбыз Марат Рамазанов алып бардылар. Ульяновск шәһәреннән килгән яшь һәм талантлы студентларның чыгышлары да бәйрәм программасын тагын да җанландырып җибәрде. Залда утыручылар һәрбер чыгышны чын күңелдән кабул итеп, көчле алкышлар белән бәяләделәр.

Постоянная ссылка на это сообщение: http://kumiakk.ru/?p=3076

Мар 06 2019

Хөрмәтле хатын-кызларыбыз!

Хөрмәтле хатын-кызларыбыз!
Сезне 8 Март — Халыкара хатын-кызлар көне
белән чын күңелдән котлыйбыз!
Хәзерге заманда хатын-кызның роле тормышта да, гаиләдә дә гаять әһәмиятле. Алар авыл хуҗалыгында, мәгариф, мәдәният, сәнәгать һәм башка өлкәләрдә актив хезмәт куялар. Эшмәкәрлек белән шөгыльләнәләр, җирле үзидарә органнарында, хакимият структураларында эшлиләр. Безнең уртак бурычыбыз — аларга рухи яктан һәм һөнәри үсештә ярдәм итү.
Без күп балалы әниләргә, ятим балалар алып тәрбияләүче гаиләләргә, үзләрен шушы бөек вазифага багышлаган барлык хатын-кызларга ихластан рәхмәтлебез. Ана телебезгә, мәдәниятебезгә һәм милли традицияләребезгә мәхәббәт гаиләдә тәрбияләнә. Ә шушы күркәм гадәтләргә өйрәтүне гаиләдә әниләрдән, хатын-кызлардан да остарак башкаручы юк. Алар — киләчәк буынга әхлак-тәрбия бирүчеләр.
Хөрмәтле хатын-кызларыбыз, бәйрәм көнегездә барыгызга да бихисап гөл-чәчәкләр, күңелле мизгелләр, тынычлык, мәхәббәт һәм муллык, бәхет телибез. Һәрвакыт елмаеп яшәгез, бәхет-шатлыклар һәрбер көнегезне язгы кояш кебек якты итсен. Гаиләләрегезгә иминлек, тыныч тормыш телибез. Бәйрәмегез мөбарәк, бәхетегез түгәрәк булсын!

Л. Ф. Богданова,
Иске Кулаткы районы Башлыгы, “Бердәм Россия”
партиясенең урындагы бүлекчә Секретаре.
И. Ш. Магдеев,
Иске Кулаткы район администрациясе Башлыгы.

Постоянная ссылка на это сообщение: http://kumiakk.ru/?p=3071

Предыдущие сообщения «